كەمپی هۆل؛ نەوەیەكی تووندڕەوی خەفەكراو

07/03/2020

:: ناوەندی کوردستان بۆ توێژینەوە لە ململانێ و قەیرانەکان

نووسینی: ئیلیزابێس تسركۆڤ-دارین خەلیفە
وەرگێڕانی: حسێن ئەحمە حسێن

خێزانی دەیان هەزار ئەندامی داعش، لە باكووری خۆرهەڵاتی سوریا بوونەتە یەخەگیرییەكی گەورە، چونكە زیاد لە دوو ساڵە هێزەكانی سوریای دیموكرات (هەسەدە)، خێزانی چەكدارە بیانی و سورییەكانی داعش لە كەمپە كاتییەكانی باكووری خۆرهەڵاتی سوریادا دەستبەسەر دەكات، گەورەترین ئەو كەمپانەش ئەوەی نزیك شارۆچكەی هۆلی سەر بە پارێزگای حەسەكەیە. هەسەدە لە ئازاری 2019دا، نزیكەی 60 هەزار كەسی لە كەمپی هۆلدا دەستبەسەر كرد، ئەو ژمارەیە ئەوانە بوون، كە لە دوایین مۆڵگەی چەكدارەكانی داعش لە نزیك شارۆچكەی باغۆزی دێرەزوور هاتنە دەرەوە. ئێستا ئەو هێزە نزیكەی 12 هەزار زیندانیی لایە، كە گومان دەكرێت سەر بە داعش بن، هەروەها گشت ئەو هاووڵاتییە سوری و هەزاران منداڵ و ژنانەی، كە پەیوەندیی خزمایەتییان لەگەڵ دەستگیركراوەكاندا هەیە. هەندێك لەو ژن و منداڵانەی لە لای هێزەكە دەستگیرن، پێشتر ئەندامی پۆلیسی حیسبە (پۆلیسی داعش) بوون، یاخود چەكدار بوون لەو دەستەیەی بە (ئەشبال ئەلخیلافە) ناسرابوو، هەرچی ژنەكانی دیكەشە تەنها هاوسەر یاخود دایك یا ژنی ماڵ بوون. واتا ژنانی كەمپی هۆل گشتیان هاوشێوە نین، بەڵكوو پێشینەی جیاوازیان هەیە، هەندێكیشان بە هۆی كەمفامی یاخود دۆخی ناهەموار یا بە زۆر بوونەتە ئەندامی داعش.

هێرشە سەربازییەكەی توركیا بۆ سەر باكووری خۆرهەڵاتی سوریا و كشانەوەی هێزەكانی ئەمەریكاش لەو ناوچەیە لە تشرینی یەكەمی 2019دا، بوونە هۆی لاوازكردنی تواناكانی هەسەدە، ئەمەش پرسیاری لەسەر توانای بەردەوامبوونی ئەو هێزە لە پاسەوانیی ئەو زیندانییانەی داعش و خێزانەكانیان درووست كردووە. لەم مانگانەی دواییدا هەسەدە لە ئازادكردنی ئەندامانی خێزانە سورییەكاندا پەلە دەكات، ئەمەش بە هۆی ئاستی نەشیاویی بژێوییان و فشاری زۆری كەسوكاری ئەو خێزانە دەستگیركراوانەوەیە. بەڵام لە كاتی ئازادكردنیاندا، ئەو ژن و منداڵانە دەنێردرێنە ناو كۆمەڵگەیەكی نائامادەوە، لە زۆربەی كاتەكانیشدا بە هۆی ئەندامێتیی پێشووی ئەوانەوە لە ڕێكخراوی داعشدا، ئەو كۆمەڵگەیانە ئامادە نین هاریكارییشیان بكەن. توانای هەسەدەش لە ئاوێتەكردنەوەی ئەو هەزاران دەستبەسەركراوە لە كەمبوونەوەدایە، لە هەمان كاتدا ڕێكخراوە ناحكومییەكانیش ناتوانن هاوكارییە پێویستەكان پێشكەشی ئەو كەسە ئازادكراوانە بكەن.

 

بۆ داگرتن کلیکی ئێرە بکە

# داعش

Islamic Studies copyright 2017 © . All right reserved Developed by Avesta Group and powered by Microsoft Azure