حەمیدە قوتب، ئەڵقەی پەیوەندی سەید قوتب و ئیخوان

04/08/2020

:: ناوەندی کوردستان بۆ توێژینەوە لە ململانێ و قەیرانەکان

 

حەمیدە فوتب ئیبراهیم، خوشكی بچوكی سەید قوتب تیۆرسێنی ئیخوان، ساڵی 1937 لە گوندی موشا لە پارێزگای ئەسیوت لەدایكبووە، بنەماڵەی قوتب بەوە ناسراون كە گرنگیان بە بواری ئەدەب دەدا، حەمیدە لەژێر كاریگەری سەید قوتبی برای گرنگی بە شیعر و ئەدەب دەدا، كاتێك سەید پەیوەندی بە ئیخوانەوە كرد و بووە سەرپەرشتیاری رۆژنامەی (الاخوان المسلمون) دەرگای بەسەر خوشكەكانی كردەوە تا لەو رۆژنامە بابەت بڵاوبكەنەوە، حەمیدە چەند وتاری لەو رۆژنامە بڵاوكردەوە، ئەمە وێڕای ئەوەی لە گۆڤاری (المسلمون)یش چەند وتاری بڵاوكردەوە.

حەمیدە دوای پەیوەندیكردنی بە ئیخوانەوە، لەگەڵ زەینەب غەزالی لەناو ریزی ئافرەتان سەرقاڵی بانگەواز بوو، دوای رووداوی مەنشییە لە 1954 كە ژمارەیەكی زۆری ئیخوان دەستگیركران لەناویشیاندا سەید قوتب، حەمیدە لەگەڵ ژمارەیەك ئافرەتی تر سەرپەرشتی خێزانی ئیخوانە دەستگیركراوەكانی دەكرد.

سەید و هاوڕێكانی لەناو بەندیخانە جمۆجۆڵ و چالاكیان دروستكرد، لەو دەمەدا بۆ ماوەی چەند ساڵ حەمیدە بووە ئەڵقەی پەیوەندی نێوان سەید قوتب و سەركردەكانی ئیخوان لە دەرەوە، تا لە 1965 بە تۆمەتی گواستنەوەی زانیاری و دەستنوسی كتێبی (معالم في الطریق)ی سەید قوتب بۆ رێكخستنی ئیخوان دەستگیر كرا، حەمیدە زانیاریەكانی لە سید قوتب دەگواستەوە بۆ محەمەد یوسف هەواش و عەلی عەشماوی و بە پێچەوانەوە، لەسەر ئەو تۆمەتەش زیندانی دە ساڵ و كاری قورسی بەسەردا سەپێنرا، شەش ساڵی و چوار مانگی لە بەندیخانە بەسەر برد و لە 1972 ئازادكرا.
دوای ئازادبوونی، لەگەڵ پزیشكێك بەناوی حەمدی مەسعود هاوسەرگیری كرد و روویكردە وڵاتی فەڕەنسا، لەوێش كەوتە بانگەوازكردن بۆ بیری ئیخوان، چەندین بەرهەمی چاپكراوی هەیە لەوانە: رحلة في احراش اللیل، درس في الصغر، نداء إلى الضفة الأخرى، جنة الرعب، الأطياف الأربعة. لە 17 تەموز 2012 كۆچی دوایی كردووە.

سەرچاوە:
بوابة الحركات الاسلامیة

# سەید قوتب # ئیخوان موسلمین

Islamic Studies copyright 2017 © . All right reserved Developed by Avesta Group and powered by Microsoft Azure