دوای مەحمود عیزەت، كێ دەبێتە رابەری ئیخوان؟

29/08/2020

:: ئیدریس سیوەیلی

 

رۆژی هەینی (28 ئاب 2020) وەزارەتی ناوخۆیی میسر لە بەیاننامەیەكدا دەستگیركردنی مەحمود عیزەت كەسی یەكەمی ئیخوانی دەستگیر كرد، بە گوێرەی بەیاننامەكە عیزەت لە شوقەیەكی نیشتەجێبوون لە ناوچەی پێنج لە قاهیرەی نوێ دەستگیر كراوە.

لە بەیاننامەكەی وەزارەتی ناوخۆ ئەوەش هاتووە كە لە هەڵەمەتی دەستگیركردنی ناوبراو دەستگیراوە بەسەر چەند كۆمپیوتەر و مۆبایلێك كە بەرنامەی موشەفەری تێدابووە بۆ پارێزگاری لە پەیوەندییەكان و بەرێوەبردنی كاروبارەكان لە ناوخۆ و دەرەوەی میسر.

لای خۆشیەوە، پارتی ئازادی و دادپەروەردی كە باڵی سیاسیی ئیخوانی میسرە، لە بەیاننامەیەكدا دەستگیركردنی ناوبراوی پشتڕاست كردەوە و بەرپرسیاری سەلامەتیشی خستە ئەستۆی دەسەڵاتدارانی میسر، ئیخوان لە بەیاننامەكەیدا ئاماژەی بەوەشداوە كە سورن لەسەر رێبازەكەیان و كاروبارەكانیان بەشێوەیەكی رێكخراو بەرێوەدەبەن، هەرچەندە رێگەیان سەخت بێت و قوربانی زۆر بدەن ئەوان سورن لەسەر بەدیهاتنی ئامانجەكانیان و دژایەتی ستەم و ستەمكاران و دەستەبەركردنی مافی گەلی میسر.

ماوەی حەوت ساڵ بوو دەسەڵاتدارانی میسر بەشوێن مەحمود عیزەتەوە بوون تا دەستگیری بكەن، چەندین تۆمەتی لەلایەن دەسەڵاتدارانی میسرەوە خراوەتە پاڵ و دوو فەرمانی لەسێدارەدان، دوو فەرمانی زیندانی هەتاهەتایی و ژمارەیەك حوكمی تر لە دژی دەرچووە.

جێی ئاماژەیە دوای كودەتای عەبدولفەتاح سیسیی بەسەر محەمەد مورسی سەرۆكی میسر لە 2013 كە ئیخوان بوو، حكومەتی میسر ئیخوانی خستە لیستی تیرۆرە و تەواوی چالاكییەكانی قەدەغەكرد، بەمەش ژمارەیەكی زۆری سەركردەیان دەستگیركرا و هەندێكیشان هەڵاتن بۆ دەرەوەی وڵات، كاروبارەكانی ئەو رێكخراوەش لەو كاتەوە بەشێوەی نهێنی بەرێوەدەچێت و هەر جۆرە جموجۆڵ و چالاكییەكیشیان لەلایەن حكومەتی میسرەوە خراوەتە ژێر چاودێری ورد و رووبەڕووی لێپێچینەوە دەبنەوە.

مەحمود عیزەت كێیە؟

 مەحمود عیزەت ئیبراهیم لە 13 ئابی 1944 لە قاهیرە لەدایك بووە، خێزاندارە و باوكی پێنج منداڵە، هەڵگری بڕوانامەی دكتۆرایە لە بواری پزیشكی، دواتریش دبلۆمی لە پەیمانگای توێژینەوەی ئیسلامیی وەرگرتووە، لە منداڵیەوە بە بیری ئیخوان ئاشنا بووە، ئەوكاتەی خوێندكاری كۆلێجی پزیشكی بووە بە فەڕمی بوەتە ئەندامی ئیخوان لە 1962، لە 1965 دەستگیر كراو بە 10 ساڵ زیندانی حوكم دراوە، لە 1974 ئازادكراوە، پاشان خوێندنی تەواو كردوە، پلەكانی ئەندامێتی لەناو ئیخواندا بڕیوە تا لە 1981 بوەتە ئەندامی مەكتەبی ئیرشادی ئیخوان، چەندجاری تریش لەلایەن دەسەڵاتدارانی میسرەوە دەستگیركراوە، لە ناو راگەیاندنی میسری بە پیاوە ئاسنینەكە ناسراوە، لە 20 ئاب 2013 دوای دەستگیركردنی محەمەد بەدیع لە جیاتی رابەری گشتیی بوەتە هەڵسورێنەری كاروبارەكانی تا دەستگیركردنی لە لایەن دسەڵاتدارانی میسرەوە.

كێ دەبێتە رابەری نوێی ئیخوان؟

 لە ئێستادا ئیخوانی میسر بە دۆخێكی هەستیار و پڕ مەترسیدا تێدەپەڕێت، بەهۆی قەدەغەكردنی چالاكییەكانی ئەو رێكخراوە لە ناوخۆی میسر دیاریكردنی رابەری نوێ هەر وا ئاسان نییە، ئایا كەسێك لە ناوخۆی میسر یان دەرەوە دەستنیشان دەكرێت؟ زۆرترین ئەگەر بەو ئاراستەیە كە لەناو ئەوانەی لە دەرەوەن كەسێك بۆ رابەری گشتیی دیاریبكرێت، لەم نێوەندەشدا چەند ناوێك باس دەكرێن، ئەوانیش: محەمەد بوحەیری نیشتەجێی لەندەن، ناوبراو وەك باڵێكی سەرەكی مەحمود عیزەت لە راپەڕاندنی كاروبارەكانی دەرەوە هەژمار دەكرێت، قوتابی مستەفا مەشهور بووە، لەناو بنكەی جەماوەی ئیخوان پێگەیەكی بەهێزی هەیە و بەرپرسی زۆرینەی دۆسیەكانی ئیخوانە لە دەرەوە. كەسێكی تریش كە ناوی دەهێنرێت ئیبراهیم مونیر بەرپسی نوسینگەی لەندنی ئیخوان سەرپەرشتیاری چەندین پرۆژەی ئابوری ئیخوان لە دەرەوە. هەروەها كەسی سێیەمیش یوسف نەدا ئیمپراتۆڕی دارایی ئیخوان لە دەرەوە كە ئێستا لە ئەوروپا نیشتەجێییە. لە هەموو دۆخێكدا ئەوەی دەبێتە رابەری نوێی ئیخوان رووبەڕووی ئاڵنگاری گەورە دەبێتەوە و زەحمەتە بتوانێت بە ئاسانی ئەم قۆناغە هەستیارەی كاری ئەو رێكخراوە تێپەڕێنێت.

# ئیخوان موسلمین

زۆرترین خوێندراوە


Islamic Studies copyright 2017 © . All right reserved Developed by Avesta Group and powered by Microsoft Azure