دیوی تاریكی هه‌واڵگری توركیا

پێش 2 هەفتە

:: بێ نوسەر ناوه‌ندی كوردستان بۆ توێژینه‌وه‌ له‌ململانێ و قه‌یرانه‌كان
نووسینی: مایكڵ ڕۆبن
سه‌رچاوه‌: ناشناڵ ئینترێست


له‌پێناو سنورداركردن و لاوازكردنی بژارده‌كانی به‌رده‌م دبلۆماته‌ ئه‌مریكییه‌كان واده‌رده‌كه‌وێت توركیا و دامه‌زراوه‌ نیشتمانیه‌ هه‌واڵگرییه‌كه‌ی خراپ  پرۆسه‌ هه‌واڵگری و دبلۆماسییه‌كانیان به‌كارهێنابێت له‌رێگه‌ی پێدانی زانیاری هه‌واڵگری ناڕاست و هه‌ڵه‌وه‌.
له‌ 7ی ئابی 2019 باڵوێزخانه‌ی ولایه‌ته‌ یه‌كگرتووه‌كانی ئه‌مریكا له‌ توركیا به‌یاننامه‌یه‌كی ڕایگه‌یاند و ئاماژه‌ی به‌وه‌كرد كه‌ واشنتۆن له‌گه‌ڵ ئه‌نقه‌ره‌ گه‌شتۆته‌ رێككه‌وتن له‌سه‌ر جێبه‌جێكردنی "رێوشوێنه‌ سه‌ره‌تاییه‌كانی تایبه‌ت به‌ نیگه‌رانییه‌ ئه‌منییه‌كانی توركیا" و دامه‌زراندنی "ڕاڕه‌و (ناوچه‌یه‌كی) ئارام" له‌ ناوچه‌كانی ژێر ده‌سه‌ڵاتی كورده‌كان له‌ سوریا. ئامانج له‌ رێككه‌وتنه‌كه‌ش ڕه‌واندنه‌وه‌ی ئه‌و قه‌یرانه‌بوو كه‌ جموجۆڵی هێزه‌ سه‌ربازییه‌كانی توركیا به‌ درێژایی سنوروه‌كانی سوریا دروستیان كرد و هه‌ڕه‌شه‌ی داگیركردنی باكووری سویایان ده‌كرد كه‌ به‌ڕواڵه‌ت بۆ جه‌نگی دژ به‌ تیرۆر بوو. سه‌ره‌ڕای ئه‌نجامدانی رێككه‌وتنه‌كه‌ به‌ڵام هێشتا وورده‌كاری و ته‌واوی ئه‌و رێككه‌وتنه‌ بۆ ڕای گشتی ئاشكرانه‌كراوه‌.
به‌رپرسانی توركیا به‌رده‌وام گازنده‌ی ئه‌وه‌ ده‌كه‌ن كه‌ هاوپه‌یمانی ولایه‌ته‌ یه‌كگرتووه‌كانی ئه‌مریكا له‌گه‌ڵ كورده‌كانی سوریا خیانه‌تكردنه‌ له‌ هاوبه‌شی و هاوپه‌یمانێتی چه‌ندین ده‌یه‌ی نێوان ولایه‌ته‌ یه‌كگرتووه‌كان و توركیا. زیاتر له‌وه‌ش دبلۆماتكارانی توركیا پێیان وایه‌ كه‌ یه‌كینه‌كانی پاراستنی گه‌ل (یه‌په‌گه‌) و گرووپه‌ چه‌كدارییه‌كانی تری سه‌ر به‌ یه‌په‌گه‌ لقێكن له‌ پارتی كرێكارانی كوردستان – په‌كه‌كه‌- كه‌ له‌ لیستی تیرۆریسی ولایه‌ته‌ یه‌كگرتووه‌كانی ئه‌مریكا وه‌ك گرووپێكی تیرۆریستی پۆلێنكراوه‌. بۆیه‌ به‌رده‌وام به‌پرسانی توركیا به‌ هاوتا ئه‌مریكییه‌كانیان وتووه‌ ه‌ "ئێوه‌ ناتوانن دژی گرووپێكی تیرۆریستی بجه‌نگ و له‌گه‌ڵ گرووپێكی تر كاربكه‌ن".
سه‌ره‌ڕای ئه‌وه‌ی په‌یوه‌ندییه‌كانی نێوان پارتی كرێكارانی كوردستان و یه‌كینه‌كانی پاراستن گه‌ل ڕاسته‌، به‌ڵام هێشتا ئه‌و دوو گرووپه‌ هه‌مان حزب و رێكخراونین. هه‌روه‌ها، دروسته‌ كه‌ پارتی كرێكارانی كوردستان له‌ لیستی تیرۆریدا پۆلێنكراوه‌، به‌ڵام به‌رپرسانی توركیا زۆر بێمانان كاتێك پێشنیاری ئه‌وه‌ ده‌كه‌ن كه‌ به‌هه‌مان شێوه‌ مامه‌ڵه‌ له‌گه‌ڵ یه‌كێنه‌كانی پاراستنی گه‌ل له‌ سوریا و رێكخراوی ده‌وڵه‌تی ئیسلامی – داعش بكرێت. له‌ڕاستیدا سووربوونی توركه‌كان له‌سه‌ر دژایه‌تی كورده‌كان زۆر بێمانایه‌ و ئه‌وه‌شی لای ولایه‌ته‌ یه‌كگرتووه‌كانی ئه‌مریكا دروستكردووه‌ كه‌ واشنتۆن ته‌نها كاتێك پشتیوانی و هاوپه‌یمانی له‌گه‌ڵ یه‌په‌گه‌ ده‌كات كه‌ به‌ڵگه‌ی حاشاهه‌ڵنه‌گر هه‌یه‌ له‌سه‌ر سوودبینین و پشتیوانی سه‌ركردایه‌تی سیاسی توركیا – له‌ناویدا ره‌جه‌ب ته‌یب ئه‌درۆگان و خانه‌واده‌كه‌ی – و ده‌زگا هه‌واڵگرییه‌كه‌ی له‌ رێكخراوی ده‌وڵه‌تی ئیسلامی داعش و گرووپه‌ نزیكه‌كانی تر له‌ رێكخراوی ئه‌لقاعیده‌ له‌ سوریا.
گرفتی بانگه‌شه‌ و ئارگۆمێنته‌كانی توركیا فره‌لایه‌ن و لاوازن، له‌وانه‌ش: یه‌كه‌م: تائێستا هیچ به‌ڵگه‌یه‌ك به‌رده‌ست نیه‌ له‌سه‌ر ئه‌وه‌ی كه‌ یه‌په‌گه‌ یان په‌كه‌كه‌ سه‌رقاڵی موئامه‌ره‌ یان چالاكی تیرۆریستی ڕاسته‌وخۆبن له‌ سوریا، ئه‌مه‌ش هه‌ر ئه‌و تۆمه‌تانه‌بوو كه‌ توركیا له‌ پشت ئۆپراسیۆنی چڵه‌ زه‌یتونی داگیركردنی عه‌فرینه‌وه‌ له‌ كانوونی دووه‌می 2018 بانگه‌شه‌ی بۆ ده‌كرد، به‌ڵام دوای 20 مانگ له‌ ئۆپراسیۆنه‌كه‌ ئێستا ڕوونه‌ كه‌ ئه‌و داگیركارییه‌ بۆ پاكتاوكردنی ناوچه‌ كوردییه‌كان بوو وه‌ك له‌ ریشه‌كێشكردنی تیرۆر. پاڵنه‌ری نیه‌ت خراپی توركیا ئه‌وه‌یه‌ كه‌ ئه‌و وڵاته‌ ئاماده‌یه‌ كه‌ پێشوازی له‌ ده‌یان و سه‌دان چه‌كداری داعش بكات بۆ ناو ئه‌و میلشیا چه‌كدارانه‌ی سه‌ر به‌ ئه‌نقه‌ره‌ن كه‌ له‌ عه‌فرین جێگیركراون. بۆیه‌ له‌ئێستادا زۆربه‌ی به‌رپرسانی ئه‌مریكا و ته‌نانه‌ت دبلۆماته‌ ئه‌روروپی و عه‌ره‌به‌كان تێگه‌شتوون كه‌ توركیا كارتی تیرۆر وه‌ك چه‌كێكی سیاسی دژی نه‌یاره‌كانی به‌كارده‌هێنێت.
ناڕه‌وایی و ساخته‌ی تۆمه‌ته‌كانی توركیا دژی یه‌كینه‌كانی پاراستنی گه‌ل – په‌په‌گه‌ – ته‌نها وه‌ك پارچه‌ سه‌هۆڵێكه‌ له‌ناو ده‌ریاییه‌ك (كه‌ به‌زووی ده‌توێته‌وه‌ و به‌های نیه‌). ئه‌ردۆگان به‌رده‌وام سیاسه‌تمه‌داره‌ كێ بڕكێكاره‌كانی له‌ هه‌ریه‌ك له‌حزبی كوردی باڵاده‌ست پارتی دیموكراتی گه‌لان (هه‌ده‌په‌) و چه‌پڕه‌وه‌كانی توركیا له‌ پارتی گه‌لی كۆماری (جه‌هه‌په‌) به‌ پشتیوانی تیرۆر تۆمه‌تبارده‌كات و به‌شێكیان زیندانیكردووه‌. هاوكات به‌رده‌وام شوێنكه‌وتووانی فه‌تحوڵا گوڵه‌ن – كه‌كاتی خۆی هاوپه‌یمانی ئه‌ردۆگان بووه‌ – به‌ تیرۆریست تۆمه‌تبارده‌كات و ده‌یان هه‌زاری لێ به‌ندكردوون، به‌بێ ئه‌وه‌ی گوێ به‌ رۆڵی خۆیی بدات له‌ به‌هێزكردنی پێگه‌ی سیاسی و فكری بزووتنه‌وه‌ی گوڵه‌نیه‌كان له‌ توركیا. له‌گه‌ڵ ئه‌وه‌شدا ئه‌ردۆگان هه‌زاران دۆكۆمێنت و به‌ڵگه‌ی ڕاده‌ستی به‌رپرسانی ولایه‌ته‌ یه‌كگرتووه‌كانی ئه‌مریكا كردووه‌ بۆ به‌ده‌ستهێنانی پشتیوانی ئه‌مریكیه‌كان بۆ ڕاده‌ستكردنه‌وه‌ی گوڵه‌ن، به‌ڵام وه‌زاره‌تی دادی ئه‌مریكا كۆتای به‌و دۆكۆمێنتانه‌ هێنا كه‌ توركیا پێشكه‌شی كرد به‌هۆی ئه‌وه‌ی زۆربه‌ی به‌ڵگه‌كان ساخته‌ و هه‌ڵبه‌ستراوبوون. به‌داخه‌وه‌ ئه‌و زانیارییه‌ هه‌واڵگرییه‌ لاوازانه‌ له‌ سایه‌ی رژێمه‌كه‌ی ئه‌ردۆگاندا بووه‌ به‌ دیارده‌ و رێسا زیاتر له‌وه‌ی حاڵه‌ت بێت. له‌ماوه‌ی چه‌ندین ساڵی دوای كوده‌تا سه‌ربازییه‌ شكستخواردووه‌كه‌ی ته‌مموزی 2016 ئه‌ردۆگان سه‌ركردایه‌تی پاكتاوی جۆراوجۆری ئۆپۆزسیۆنی سیاسی ده‌كات له‌ توركیا له‌سه‌ر كۆمه‌ڵێك به‌ڵگه‌ و دۆكۆمێنت كه‌ دواتر دادگاكانی توركیا وه‌ك به‌ڵگه‌ی بێبنه‌ما و ناڕاست ناساندیان. دوای ئه‌وه‌ی پازده‌ ساڵ له‌مه‌وپێش بۆ یه‌كه‌مجار ده‌ستمكرد به‌ ڕه‌خنه‌گرتن له‌ گه‌نده‌ڵی و ناشه‌فافی دارای له‌ ناوخۆی توركیا و له‌به‌سه‌ر بنه‌مای كۆمه‌ڵێك په‌یوه‌ندی و سه‌رچاوه‌ی فراوان پێشبینی ڕوودانی كوده‌تای سه‌ربازیم كرد له‌ توركیا، له‌به‌رامبه‌ردا ئه‌ردۆگان منی به‌ تیرۆریست و هاوپه‌یمانی بارزگانی ناساند و فه‌رمانی گرتنی بۆ ده‌ركردم و پاداشتی دیاریكرد بۆ ئه‌و مه‌به‌سته‌ش.
هه‌واڵگری توركیا زیاتر له‌سه‌ربنه‌مای قازانجی سیاسی و خه‌یاڵ خاوی (واته‌ واتێك لای خه‌ڵكی ویستراوبێت) وه‌ك له‌ كارامه‌یی و پرۆڤیشناڵێتی بنیادنراوه‌. بۆیه‌ پرسیاری جدی به‌نسبه‌ت بڕیاربه‌ده‌ستانی ولایه‌ته‌ یه‌كگرتووه‌كانی ئه‌مریكاوه‌ ئه‌وه‌یه‌ كه‌ ئه‌بێت چه‌ندێك بێت هه‌واڵگری توركیا به‌و شێوه‌یه‌ تێوه‌گلاوه‌ له‌ گه‌نده‌ڵی؟ به‌رله‌م قه‌یرانه‌ دبلۆماسییه‌ی ئێستای نێوان هه‌ردوو وڵات، هه‌ریه‌ك له‌ ده‌زگای هه‌واڵگری ناوه‌ندی (سی ئای ئه‌ی) و وه‌زاتی ده‌ره‌وه‌ی پشتیان ده‌به‌ست به‌ هه‌واڵگری توركیا و هه‌ماهه‌نگی نزیكیان هه‌بوو. 
بابچینه‌ سه‌ر پارتی كرێكارانی كوردستان – په‌كه‌كه‌: ولایه‌ته‌ یه‌كگرتووه‌كانی ئه‌مریكا له‌ ساڵی 1997 په‌كه‌كه‌ی وه‌ك گرووپێكی تیرۆریستی پۆلێنكرد، ئه‌ویش دوای ئه‌وه‌ی ئیداره‌ی بێڵ كلینتۆن له‌ كۆتا هه‌وڵه‌كانی بۆ ئه‌نجامدانی گرێبه‌ستێكی گه‌وره‌ی فرۆشتنی چه‌ك به‌ توركیا نزیكبووه‌وه‌. ئه‌لیزا ماركۆس (Aliza Marcus) له‌ كتێبه‌كه‌یدا به‌ناونیشانی خوێن و باوه‌ڕ: خه‌باتی كورد و په‌كه‌كه‌ بۆ سه‌ربه‌خۆیی "Blood and Belief: The PKK and the Kurdish Fight for Independence " ئه‌وه‌ی خستۆته‌ڕوو له‌كاتێكدا په‌كه‌كه‌ تێوه‌گلاوه‌ له‌ توندوتیژی و له‌وانه‌شه‌ كرده‌وه‌ی تیرۆریستی له‌ ساڵانی سه‌ره‌تای هه‌ڵمه‌ته‌ چه‌كدارییه‌كانیان دژی توركیا، به‌ڵام له‌ كۆتای 1990ه‌كاندا چالاكییه‌ یاخیبوونی سه‌ربازی "insurgency " یان ده‌ركه‌وت. سه‌رۆكی ئه‌و كاته‌ی توركیا – توركت ئۆزۆڵ – پلانی زنجیره‌یه‌ك گفتوگۆ و دانوستانی ئاشتی له‌گه‌ڵ په‌كه‌كه‌ دانا به‌ر له‌وه‌ی به‌ نه‌خۆشی دڵ له‌ 1993 كۆچی دوای بكات. ته‌نانه‌ت دوای بیست ساڵ هێشتا ڕوون نه‌بوو كه‌ ئاخۆ پۆلێنكردنی په‌كه‌كه‌ وه‌ك گرووپێكی تیرۆریستی گونجاوه‌ بۆ ئه‌و گرووپه‌ یان نا؟ له‌ڕاستیدا له‌ سه‌ره‌تای ئه‌م ساڵدا دادگای به‌لجیكا بڕیاریدا كه‌ په‌كه‌كه‌ گرووپێكی تیرۆریستی نیه‌ و چالاكییه‌كان و جموجۆڵی لایه‌نگرانی كاری تیرۆریستی نیه‌. ئه‌و بڕیاره‌ش یه‌كێكه‌ له‌ زنجیره‌ دۆڕانه‌كانی توركیا به‌تایبه‌تی كاتێك دادگا ئه‌وروپیه‌كان كاریان له‌سه‌ر ئه‌و به‌ڵگانه‌كرد كه‌ له‌سه‌ر تۆمه‌تی تیرۆریستی ده‌ده‌نه‌ پاڵ پارتی كرێكارانی كوردستان. ئه‌مه‌ش ئه‌وه‌ ناگه‌یه‌نێت كه‌ بووترێت كه‌ چالاكی تیرۆریستی دژی توركیا نه‌بووه‌ – بۆ نموونه‌ چه‌ندین هێرشی چه‌كداری له‌ناوخۆی توركیا له‌لایه‌ن گرووپی هه‌ڵوكانی ئازادی كوردستان "Kurdistan Freedom Falcons"(تاك - TAK) ه‌وه‌ ئه‌نجامدراوه‌، له‌گه‌ڵ ئه‌وه‌شدا هێشتا هیچ به‌ڵگه‌یه‌ك له‌به‌رده‌ستدانیه‌ ئه‌و هێرشانه‌ نه‌له‌لایه‌ن یه‌په‌گه‌ له‌ سوریا و نه‌ په‌كه‌كه‌ له‌ قه‌ندیل رێكخرابێت، ته‌نانه‌ت هیچ به‌ڵگه‌یه‌ك له‌به‌رده‌ستدا نیه‌ كه‌ گرووپی هه‌ڵۆكانی ئازادی كوردستان و پارتی كرێكارانی كوردستان هه‌مان حزب و رێكخراون، ئه‌شێت له‌ ڕاستیدا گرووپ گه‌لێك بن كه‌ هه‌وڵی له‌باربردنی پرۆسه‌ی ئاشته‌وایی بده‌ن.
بۆیه‌ بۆ ولایه‌ته‌ یه‌كگرتووه‌كانی ئه‌مریكا پرسیاره‌كه‌ ته‌نها ئه‌وه‌ نیه‌ ئاخۆ هیچ به‌ڵگه‌یه‌ك هه‌یه‌ جیا له‌ سه‌رچاوه‌كانی حكومه‌تی توركیا بۆ پشتڕاستكردنه‌وه‌ی بانگه‌شه‌ی تیرۆریست بوونی په‌كه‌كه‌، به‌ڵكو ئایا هیچ به‌ڵگه‌یه‌ هه‌یه‌ كه‌ بیسه‌لمێنێت سه‌ركرده‌ دیاره‌كانی كورد كه‌سانی تاوانبارن؟ بۆ نموونه‌ تێڕوانین له‌ كه‌یسی ئاده‌م ئوزون "Adem Uzun" ئه‌ندامی باڵای "كۆما جڤاكێن كوردستان the Kurdistan National Congress  "(كه‌جه‌كه‌-  KCK) و رۆشنبیر و چالاكوانه‌ سیاسییه‌ دیاره‌كاین كورد كه‌ له‌ ساڵی 2012 له‌ پاریس ده‌ستگیركران كه‌ بووه‌ هۆی هاتنه‌ده‌نگی دادگای به‌لجیكا و له‌كۆتایدا به‌قازانجی په‌كه‌كه‌ كه‌وته‌وه‌ كه‌ ئه‌و حزبه‌ی وه‌ك گرووپێكی تیرۆریستی نه‌ناساند. له‌ ساڵی 2011 كاتێك هێشتا سه‌رۆك باراك ئۆباما ئه‌ردۆگانی وه‌ك یه‌كێك له‌ باوه‌ڕپێكراوترین دۆسته‌ ده‌ره‌كییه‌كانی هه‌ژمار ده‌كرد، وه‌زاره‌تی گه‌نجیه‌نی ولایه‌ته‌ یه‌كگرتووه‌كانی ئه‌مریكا ئوزون و ژماره‌یه‌ك له‌ هاوڵه‌كانی وه‌ك قاچاخچی چه‌ك و ماده‌ هۆشبه‌ره‌كان ده‌ستنیشانكرد، ئه‌مه‌ش بووه‌ جێگه‌ی دڵخۆشی حكومه‌ته‌كه‌ی ئه‌ردۆگان. له‌كاتێكدا ئه‌و بڕیاره‌ بووه‌ هۆی ئیفلیجی كردنی هه‌ر هه‌وڵێكی به‌رپرسانی ره‌سمی ولایه‌ته‌ یه‌كگرتووه‌كانی ئه‌مریكا بۆ گفتوگۆ و دانوسان و دانیشتن له‌گه‌ڵ سه‌ركرده‌ و چالاكوانه‌ سیاسییه‌ دیاره‌كانی كورد، به‌ڵام هێشتا هیچ ئاماژه‌یه‌ك نیه‌ كه‌ ئه‌و زانیارییانه‌ی وه‌ك به‌ڵگه‌ له‌لایه‌ن حكومه‌تی توركیاوه‌ بۆ ولایه‌ته‌ یه‌كگرتووه‌كانی ئه‌مریكا سه‌رباره‌ به‌ ئوزون دابینكرا ڕاست بێت. 
به‌ كورتی، له‌پێناو سنورداركردن و لاوازكردنی بژارده‌كانی به‌رده‌م دبلۆماته‌ ئه‌مریكییه‌كان توركیا و ده‌زگای هه‌واڵگری نیشتمانی ئه‌و وڵاته‌ – میت- خراپ  پرۆسه‌ هه‌واڵگری و دبلۆماسییه‌كانیان به‌كارهێناوه‌ له‌ڕێگه‌ی پێدانی زانیاری هه‌واڵگری ناڕاست و هه‌ڵه‌وه‌. بۆیه‌ له‌بری قبوڵكردنی كوێرانه‌ی تۆمه‌ته‌كانی توركیا سه‌رباره‌ت به‌ یه‌په‌گه‌ و په‌كه‌كه‌ و سه‌ركرده‌ و چالاكوانه‌ سیاسییه‌ دیاره‌كانی كورد، كاتی ئه‌وه‌ هاتووه‌ كه‌ دامه‌زراوه‌ی هه‌واڵگری ولایه‌ته‌ یه‌كگرتووه‌كان پێداچوونه‌وه‌ به‌ یه‌ك به‌ یه‌كی ئه‌و زانیاری و هه‌واڵگرییانه‌دا بكات كه‌ توركیا له‌ چه‌ند ده‌یه‌ی ڕابردوو داویه‌تی به‌ ولایه‌ته‌ یه‌كگرتووه‌كان ئه‌مه‌ش له‌پێناو ئه‌وه‌ی كه‌ هه‌واڵگری ولایه‌ته‌ یه‌كگرتووه‌كانی ئه‌مریكا دووربێت له‌ هه‌لپه‌رستی سیاسی و گه‌نده‌ڵی و رێگه‌ بگیردرێت له‌ خراپ به‌كارهێنانی هه‌ماهه‌نگی هه‌واڵگری بۆ ده‌ستێوه‌ردان و خۆهه‌ڵقورتاندن له‌ ئاراسته‌ی سیاسی و دبلۆماسی ولایه‌ته‌ یه‌كگرتووه‌كانی ئه‌مریكا. ئه‌شێت ئه‌و پێداچوونه‌وه‌یه‌ به‌ زانیاری و هه‌واڵگرییه‌كانی توركیا كه‌ دراوه‌ به‌ ئه‌مریكا بگاته‌ ئه‌و ده‌ره‌نجامه‌ی كه‌ پێویسته‌ وشیاری بدرێت به‌ ده‌زگای هه‌واڵگری ناوه‌ندی (سی ئای ئه‌ی) و وه‌زاره‌تی ده‌ره‌وه‌ی ئه‌مریكا له‌ پشت به‌ستن به‌ توركیا. زیاتر له‌وه‌ش ره‌نگه‌ ببێته‌هۆی ده‌رخستنی ئه‌و ڕاستییه‌ی كه‌ ئه‌و به‌ڵگه‌ و زانیارییانه‌ی به‌م دواییه‌ توركه‌كان داویانه‌ به‌ ئه‌مریكا ناڕاست و هه‌ڵبه‌ستراون، كه‌ سه‌ره‌نجام بۆ ئه‌مریكا ڕوونده‌بێته‌وه‌ كه‌ پێویستی هه‌نووكه‌ی هه‌یه‌ بۆ دووباره‌ هه‌ڵسه‌نگاندنه‌وه‌ی سه‌رله‌به‌ری په‌یوه‌ندییه‌كانی ئه‌مریكا له‌گه‌ڵ توركیا. له‌هه‌ر ئه‌گه‌رێكدا له‌وانه‌ی سه‌ره‌وه‌ ئاماژه‌ی پێكرا، هێشتا بڕیاری ئیداره‌ی دۆناڵد ترامپ و نێرده‌ی تایبه‌تی خۆی بۆ سوریا – جه‌یمس جێفری – (تایبه‌ت به‌ دروستكردنی ناوچه‌ی ئارام) كاریگه‌ی چه‌ندین ده‌یه‌ی له‌سه‌ر ناوچه‌كه‌ ده‌بێت، بۆیه‌ پێویست ناكات هیچ به‌رپرس و دبلۆماتێكی ئه‌مریكی توركیا وه‌ك نموونه‌ی گه‌ڕان به‌دوای ڕاستی و حه‌قیقه‌ته‌كاندا به‌كاربهێنێت.
   

زۆرترین خوێندراوە


political studies copyright 2017 © . All right reserved Developed by Avesta Group and powered by Microsoft Azure