جیهادی بۆلوان

16/07/2017

:: ئیدریس سیوەیلی

هۆكارەكانی پەنابردنی رێكخراوە تیرۆریستییەكان بۆ تیرۆری ناڕێكخراو
عەلی بەكر
لە ماوەی دوو ساڵی رابردوو، چەندین وڵاتی جیهان رووبەڕووی كاری تیرۆریستی بوونەوە لەلایەن گورگە تەنیاكان كە پەیوەستن بە رێكخراوە ئیسلامییە توندڕەوەكانی (داعش و قاعیدە)، ئەوەی ئەو كردەوە تیرۆریستیانەی لەوانی تر جیادەكردەوە پەنابردنی ئەنجامدەرانی بوو بۆ ئامراز و شێوازی ناباو، بەڵكو پشتبەستوو بوون بەو توانا و كەرەستانەی لەبەردەستیاندایە، بە ئامانجی كوشتنی كەسێك یاند چەند كەسێك، بە شێوازێكی چاوەڕواننەكراو، بە جۆرێك كە زەحمەتە پێشبینی روودانی ئەو كرادەوانە بكرێت، دەتوانین ئەمەش بە "جیهادی بۆلوان" ناوزەدبكەین.
ئەم جۆرە كارانە بووەتە جێگەی رەزامەندی زۆرێك لەوانەی لە ڕووی فیكرییەوە پەیوەستن بە رێكخراوە تیرۆریستییەكانەوە، چونكە بەردەستخستنی كەرەستەكانی و جێبەجێكردنی ئاسانە، ئەمەش چەندین پرسیار بەدوای خۆیدا دێنێت كە سەرچاوەی ئەم جۆرە بیركردنەوەیە چییە؟ ئەو بناغە شەرعییانە چین كە گرووپە تیرۆریستییەكان بۆ پاساودانی ئەو جۆرە كارانە پشتی پێدەبەستن؟ بەر لە وەڵامدانەوەی ئەم پرسیارانە سەرنجێك دەدەین لە تیرۆری تاكە كەس لە ئەدەبیاتی گرووپە ئیسلامییە توندڕەوەكانی قاعیدە و داعش، چونكە "جیهادی بۆلوان" بە پلەی یەكەم مەبەست پێی گورگە تەنیاكانە نەك رێكخراوە تیرۆریستییەكان، یان شانە بچوكەكانی ئەو رێكخراوانە.

یەكەم: پەیڕەوكردنی جۆری تیرۆری تاكگەرا
لە كۆتایی نەوەدەكانی سەدەی رابروو، گروپە ئیسلامییە توندڕەوەكان پەنایانبردە بەر پەیڕەوكردنی تیرۆری تاكگەرا، ئەبو موسعەبی زەرقاوی كە بە ئەندازیاری جیهادی جیهانی ناودەبرێت، لە نووسینەكانی خۆیدا ئاماژەی بەوەداوە كە پێویستە رێكخراوە جیهادییەكان پەنا ببەنە بەر تیرۆری تاكگەرا.
ئەبو موسعەب پێیوابوو، هەرچەندە جیهادی تاكگەرا دەستكەوتی سیاسی ئەوتۆ دەستەبەر ناكات، بەڵام مەعنەویاتی موجاهیدان بەرزدەكاتەوە، بۆیە داوا لە موجاهیدان دەكات كە خۆبەدوربگرن لە پەیوەستبوونی رێكخراوەیی بە رێكخراوە جیهادییەكانەوە، لەگەڵ پەیوەستبوون بە بیرۆكە و ئامانجی رێكخراوەكەوە بە مەبەستی بەدەستهێنانی ئامانجی نەخشەبۆكێشراو (1).
ئەبو موسعەب چەند ئامانجێك دیاری دەكات وەكو ئامانجی لە پێشینە بۆ تیرۆری تاكگەرا،  لە ویلایەتە یەكگرتووەكانی ئەمریكا و وڵاتە هاوپەیمانەكانی، كە خۆیدەبینێـتەوە لە ئامانجی ئابووری و ستراتیژی (ژێرخانی ئابووری)، بنكە سەربازییەكان، كەسایەتییە گشتییەكان، بە تایبەت سیاسیی و راگەیاندنكاران، بەرپرسانی حكومەت، داجاریش كەسانی سڤیل، لە رێگەی بە ئامانجگرتنیان بە كردەوەی تیرۆریستی و كوشتنی زۆرترین ژمارە لێیان (2).
ئەوەی تێبینی دەكرێت، ئوسامە بن لادن رێبەری پێشووی رێكخراوی قاعیدە، لە (1998) لە فەتوایەكدا جەختیكردەوە لە كوشتاری كەسانی ئەمریكایی و هاوپەیمانەكانی، جا كەسانی سڤیل یا سەربازی بن، پێیوابوو ئەركی هەموو تاكێكی موسڵمانە لە هەر وڵاتێك بێت كە بۆی بگونجێت ئەو كارە بكات (3).
لە (2003)ەوە رێكخراوی قاعیدە پەیڕەوی لەو جۆرە كردەوانە كرد، لە رێگەی گۆڤاری ئەلیكترۆنی (معسكر البتار) و وەرگێڕانی بەشێك لە كتێبەكانی ئەبو موسعەب زەرقاوی بۆ ئینگلیزی و بڵاوكردنەوەی لە گۆڤاری (Inspire)  كە ئەنوەر ئەلعولقی یەمەنی – ئەمریكی سەركرەی رێكخراوی قاعیدە لە نیمچەدوورگەی عەرەبی دەریدەكرد، گۆڤارەكە لەلایەن دەزگای راگەیاندنی رێكخراوی قاعیدەوە بڵاودەكرایەوە، ئەمە بووە سەرچاوەی ئیلهامبەخش بۆ گورگە تەنیاكان لە رۆژئاوا، لەوانەش كردەوەی تیرۆریستی ماراسۆن لە بۆستن لە (15 ئایار 2013) كە لە لایەن دوو براوە ئەنجامدرا.
داعش لە رێگەی چاپكردنی كتێب بە زمانی ئینگلیزی هەمان شێواز و تاكتیكی پەیڕەوكرد، لە (18 تشرینی یەكەمی 2015) كتێبێكی بەناونیشانی (رێنمایی ئاسایش و سەلامەتی بۆ موجاهیدانی گورگی تەنیا) بڵاوكردەوە، ئەو كتێبە بەتەنها باس لەوە ناكات كە كردەوەی تیرۆریستی تاكگەرا چۆن ئەنجامدەدرێت، بەڵكو باس لە چۆنێتی خۆحەشارادانیش دەكات تا كردەوەی تیرۆریستی زۆرت ئەنجامبدرێت (4)، بەوپێیەش كتێبەكانی داعش بەوە لە كتێبەكانی قاعیدە جیادەكرێتەوە كە ئەوانەی قاعیدە بە تەنها باس لە چۆنێتی ئەنجامدانی كردەوەكان دەكات، بەڵام ئەوانەی داعش باس لە خۆپەنادانی و خۆشاردنەوەی دوای كردەوە تیرۆریستییەكانیش دەكات، دواجاریش ئەوە رووندەبێتەوە هەردو گرووپەكە دركیان بەوەكردوە كە دەزگا هەواڵگرییەكانی ئەمریكا و هاوپەیمانەكانی بە زەحمەت دەتوانن ئەم جۆرە لە تیرۆر بەر لە ئەنجامدانی ئاشكرابكەن.

دووەم: پێناسەی "جبهادی بۆلوان"
لەوەی پێشتر باسكرا رووندەبێتەوە كە رێكخراوە تیرۆریستییەكانی قاعیدە  و داعش پەیڕەوی لە تیرۆری تاكگەرا دەكەن، لەو پێناوەشدا چەندین نامیلكە و بڵاوكراوەیان دەركردووە و چۆنێتی ئەنجامدانی ئەو كردەوانەی تێدا باسكراوە، داعش شتێكی زیاتریشی خستوەتەوە سەر ئەو شێوەی كار كە دەكرێت بە "جیهادی بۆلوان" ناوببرێت.
دەگونجێت پێناسەی "جیهادی بۆلوان" بەوە بكەین كە "ئەو جۆرەی توندوتیژییە كە توندڕەوان پەیڕەوی لێدەكەن لەژێر دروشمی جیهادی خود لەپێێاوی خوادا، كە ئامانج لێی كوشتار و زۆرترین زیانگەیاندنە بەوانی تر، لە رێگەی ئەو كەرەستە  و ئامرازانەی بەردەستن"، ئەم جۆرە لە توندوتیژی بە شێوەی بنەڕەتی ئامانج لێی كوشتنی نەیارانە بە شێوەی ناباو بێ پابەندبوون بەو مەرجانەی جیهاد كە لە كتێبەكانی فیقهی ئیسلامیی باسكراون و خودی گرووپە جیهادییەكانیش دەخوازن پەیڕەوی لێبكەن.
ئەم جۆرەی "جبهاد" شێوەی تاكگەراییە و جیاوازە لەو جۆرە جیهادە تەقلیدییەی كە پێویستی بە ئامادەسازی، یەكخستنی ریزەكان، پێكهێنانی سوپا و دیاریكردنی ئامانج بوو، بەڵام "جیهادی بۆلوان" بە پلەی یەكەم ئامانج لێی كوشتنە، بێ گوێدانە ئەو قازانج و زیانانەی بەدوای خۆیدا دەیهێنێت.
دەشێت نامە دەنگییەكەی ئەبو محەممەد عەدنانی وتەبێژی داعش كە لە (22 مایس 2016) بڵاویكردەوە بناغەیەك بێت بۆ ئەم جۆرەی جیهاد، ناوبراو لە نامە دەنگیەكەیدا دەڵیت: توانای خۆت بخەرەگەڕ بە كوشتنی هەر ئەمریكییەك، یان فەڕەنسییەك، یان هەریەكێك لە هاوپەیمانەكانیان، ئەگەر بۆمب و چەكت لەبەردەستتدا نەبوو، بە بەردێك برینداری بكە، یان بە چەقۆ سەریببڕە، یان لە شوێنێكی بەرز بیخەرەخوارەوە، یان بە سەیارەكەت بیشێلە" (5).
ئەو نامە دەنگییە پوختەی "جبهادی بۆلوان" لە دیدی داعش رووندەكاتەوە، بە شێوەیەك كە سادەترین كەرەستەی بەردەست دەشێت بۆ كوشتار بەكاربێت، وەكو بەرد، چەقۆ، خستەخوارەوە لە شوێنی بەرز یان هەر شتێكی هاوشێوە، ئەمەش لە كاتێكدا كە تاك كەرەستەی تری لەبەردەستدا نەبێت وەكو بۆمب و دەمانچە، كە رەنگە بەكارهێنانی پێویستی بە راهێنان هەبێت. بەمەش رێكخراوەكە دەرگای جیهاد بەرووی ئەندامان و لایەنگرانیدا واڵا دەكات، بە جۆرێك بۆ نموونە دەشێت پاڵبنێت بە كەسێكەوە لە كاتی بێئاگایدا تا بكەوێتە ژێر شەمەندەفەرێك، یان ژەهر بخاتە ناو خۆراك، یان هەر جۆرێكی تری كاری كوشتن ئەنجامبدات.
چەمكی "جیهادی بۆلوان" جیاوازە لە "جیهاد"ی تەقلیدی كە بەشێوەیەكی سەرەكی پێویستی بە مۆڵەتی (ئەمیر) هەیە، هەروەك لە ئەدەبیانی گرووپە جیهادییەكان بە (مۆڵەتدان بە جیهاد) ناودەبرێت، بەڵام لە "جیهادی بۆلوان" مۆڵەتی ئەمیر بە مەرج نەگیراوە، بەڵكو هێندە بەسە كە بەدەم بانگهێشتی گشتیی ئەو رێكخراوەوە بچێت كە پەیوەستە پێوەی، جا لە هەر شوێنێكی جبهان بوو كەی بۆی لوا دەشێت تاكەكەسەكە "جیهاد"ی خۆی ئەنجام بدات.

سێیەم: بناغە شەرعییەكانی جبهادی بۆلوان:
وێڕای سنوورداربوونی ئەو زیانانەی لە "جبهادی بۆلوان"  دەكەونەوە، بە تایبەت كاتێك ئەنجامدەرانی كردەوەكە هیچ ئەزموونێكی جەنگییان نەبێت، بەڵام تا ئێستا لە لایەن هەوادارانی گرووپە تیرۆریستییەكانەوە پێشوازی لەم جۆرە كارانە دەكرێت، هەروەك پەناخوازێكی ئەفغانی (17 ساڵ) لە (حوزەیرانی 2016) بە چەقۆ و تەور هێرشی كردە سەر سەرنشینانی شەمەندەفەرێك لە ویلایەتی باڤاریا لە باشووری ئەڵمانیا، بەرلەوەی پۆلیس هێرشبەرەكە بكوژن، چوار كەسی بریندار كرد (6)، یان ئەو هێرشەی دوو چەكدار كردیانە سەر كەنیسەیەك لە شاری روان لە باكووری فەڕەنسا و كەشیشێكیان سەربڕی، هێرشبەرەكان پەیوەستبوونی خۆیان بە داعشەوە راگەیاند (7)، ئەمە هاندەر بوو بۆ گەڕان بەدوای ئەو بناغە فیكرییانەی كە "جیهادی بۆلوان"ی لەسەر وەستاوە، گرنگترین ئەو بناغانەش بریتین لە::
1-واجبوونی "جیهادی بۆلوان": ئەو كەسانەی هەڵدەستن بەو جۆرە كارانە بڕوایان وایە كە ئەو جۆرە كارە واجبێكی ئایینییە و دەبێت ئەنجامبدرێت، ئەمەش پاڵپشتدەكەن بە چەندین ئایەتی قورئانی لەوانە: (وقاتلوهم حتی لا تكون فتنة ویكون الدین كله لله) الانفال – 39. واتە: بجەنگن - دژی كافر و خوانەناسان – تا فیتنە و ئاشووب نەمێنێت و ئایین و فەرمانبەراری هەموو بۆ خوا بێت. ئەمە وێڕای بوونی چەندین فەرمودەی پەیامبەر لەوبارەوە، لەوانە: گەورەترین كردەوە جیهادە لەپێناو خوادا (رواه مسلم). چەندین دەقی تر لەوبارەوە دەكرێنە بەڵگە، بەشێوەیەك كە ئەنجامدانی ئەو كردەوانە دەبێتە ئەركێكی ئایینی پێویست هەرچەندە ئەنجامێكی ئەوتۆش بەدینەهێنێت، چونكە ئەوان پێیانوایە كوشتاری بەردەوام بەجێهێنانی فەریزەی جیهادە (8).
2-كوشتاری ئاسان: یەكێك لەو خاڵانەی رێكخراوە تیرۆریستییەكان دەیكەنە پاساو بۆ "جیهادی بۆلوان" ئەنجامدانی كوشتارە بە هەر كەرەستەیەكی بەردەست، وەك كوشتن بە چەقۆ، برینداركردن بە بەرد، خستنەخوارەوە لە سەر شاخ یان شوێنێكی بەرز، یان بیكات بەژێر ئۆتۆمبێلەوە، یان پاڵیپێوەنێت بۆ بەردەم شەمەندەفەرێك، كەواتە مەرجی سەرەكی ئەوەیە هەركات تاك بۆی لوا و بە هەر كەرەستەیەكی بەردەستی بە ئاسانی بەرامبەرەكەی بكوژێت، هەرچەندە كەسی هێرشكراوەسەر سڤیل یان بێتاوان بێت، بەچاوپۆشی لەوەی كوشتنی كەسانی سڤیل رێگەپێنەدراوە (9).
3-جیهادی داواكراو: ئەو كەسانەی هەڵگری ئایدۆلۆژیای گرووپە تیرۆریستییەكانن، بڕوای تەواویان بە "جیهادی داواكراو" هەیە، كە بەپێی تێروانینی ئەوان پێویستە هێرش بكرێتە سەر دوژمن لە خاكی خۆیدا، تا دێتە ناو ئیسلام یان رازیدەبێت بە سەرانەدان، بۆیە هەڵگرانی ئەو بیرە سوورن لەسەر كوشتنی هاووڵاتیان لە وڵاتەكانی خۆیان لەژێر ناوی "جیهادی داواكراو"، ئەم تێڕوانینەش پەیوەستە بە یەكێك لە بنەما فیكرییەكانی ئەو گرووپانە، ئەویش (پێویستی رووبەڕوبوونەوەی كافران)، ئەو گروپانە بڕوایان وایە كە هیچ دەرەچەیەك نییە بۆ خۆبواردن لە رووبەڕووبوونەوەی كافران، ئەوە سوننەتێكی خواییە و خوا فەرزی كردوە لەسەر بەندەكانی، چونكە ئەمان خاوەن دۆزێكی رەوان، رەوایەتی دۆزەكەش واتای رووبەڕووبوونەوە لەگەڵ ئەوانی تر، هیچ جێدارێكی تری شەرعی نییە ئەو ئامانجانە بێنێتە دی، لێرەوە بیرۆكەی "پێویستی رووبەڕووبوونەوە" دەچەسپێت (10)، ئەوەی لەم بنەمایەوە دەچەسپێت پابەندبوونە بە یەكجۆری بیركرنەوە و  پەكخستنی عەقڵ و بیركردنەوەی دروستە (11).
4-وەڵامدانەوەی بانگەواز: زۆربەی ئەوانەی لەژێر ناوی "جبهادی بۆلوان" كاری تیرۆریستیان ئەنجامداوە، ئەم كارەیان وەكو وەڵامدانەوەیەكی بانگەوازی ئەو رێكخراوە كردووە كە پەیوەستن پێوەی، بە تایبەت رێكخراوی داعش، ئەو كەسانە پێیانوایە وەڵامدانەوەی بانگەوازی داعش كە داوادەكان هاووڵاتیانی ئەو وڵاتانە بكوژن كە داعش بە نەیاری خۆی لە قەڵەمی داون واجبێكی ئایینییە، ئەو كەسانە لەوبڕوایەدان گوێڕایەڵیكردنی سەركردەكانی ئەو رێكخراوە واجبێكی ئایینییە، هەروەك پێغەمبەر (د. خ) فەرموویەتی: ئەگەر بەندەیەكی حەبەشی كرایە بەرپرستان سەری وەكو مێووژی رەش وابوو گوێڕایەڵی بكەن و لە قسەی دەرمەچن. (رواه البخاری). گەورەترین وەڵامدانەوەش بەدەمەوەهاتنی جیهادە، چونكە دوو پاداشتی هەیە، پاداشتی جیهاد لە پێناوی خوا و پاداشتی گویڕایەڵی ئەمیر (12).

چوارەم: هۆكاری بڵاوبوونەوەی "جبهادی بۆلوان":
بێگومان هۆكارگەلێك لەپشت پەرەگرتنی كردەوە توندوتیژییەكانەوەیە كە لەژێر ناوی "جیهادی بۆلوان" ئەنجامدەدرێن، ئەو بیرۆكانە سنووری كیشوەرەكانی تێپەڕاندوە و لەو ناوچانە ئەنجامدەدرێن كە هەزاران كیلۆمەتر لە سنووری دەوڵەتەكەی داعشەوە دوورن، لەوانەیە دیارترین هۆكاری گەشەسەندنی ئەو كارە توندوتیژییانە ئەمانە بن:
1-نەبوونی پەیوەستی رێكخراوەیی: ئەوانەی كاری توندوتیژی ئەنجامدەدەن لە ژێر ناوی "جبهادی بۆلوان" ئەو كەسانەن كە خوازیاری سەرخستنی ئەو رێكخراوانەن كە هەڵگری ئایدۆلۆژیانن، بەڵام دەرفەتی ئەوەیان نییە پەیوەست بن بە ریزەكانیانەوە، بۆیە پەنا دەبەنە بەر كاری تیرۆریستی تا خزمەت بە ئامانجەكانیان بكەن، ئەمەش پێویستی بە پەیوەستبوونی ئۆرگانی نییە، تا لەو رێگەیەوە كەسەكە راسپێردرێت بۆ كاری تیرۆریستی، ئەم پەیوەستنەبوونە هەلی بۆ سەدان ئەندام رەخساندووە كە هاوبیری گرووپە تیرۆریستییەكانن بێ بوونی پەیوەندی ئۆرگانی لەژێر پەردەی شەرعدا –بە دیدی خۆیان – كاری لەو شێوە بكەن كە پێیانوایە خزمەت بە ئیسلام دەكات.
2-پێویستنەبوونی ئەزموونی كاری چەكداری: ئەوكەسانەی لەژێر ناوی "جبهادی بۆلوان" كاری توندوتیژی ئەنجام دەدەن، پێویستیان بە هیچ ئەزموونێكی كاری چەكداری یان راهێنان لەسەر تەقاندنەوە نییە، بەڵكو ئەم جۆرە كارە توندوتیژییانە بە شێوەیەكی بنەڕەتی پشتئەستوورە بە كەرەستە بەردەستەكان، كە لەبەردەستی زۆرینەدا هەیە و بە چەكی سپی ناودەبرێن، هێرشبەر كارەكە ئەنجامدەدات و هێرشكراوەسەر لە كاتی بێئاگایدایە، هەروەك ئەم جۆرە كارە پێویستی بە توانای دارایی و ماددی ئەوتۆ نییە، هێندە بەسە رێكخراوەكە داوا لە هەوادارانی - كە زۆرجار بە "سەربازانی خیلافەت" ناودەبرێن - بكات لە سەرانسەری جیهان تا بەو كارە هەستن، ئەمەش بۆ رێكخراوە سەركەوتنێكی گەورەیە كە بێ تێچوونی ماددی دەستی دەگات بە زۆر شوێنی هەستیاری نەیارانی، زۆرجاریش ئەوانەی كردەوەكان ئەنجامدەدەن كەسانی نەناسراون و رێكخراوە هیچ پارەیەكی بۆ خەرج نەكردوون.
3-خۆكوژی بەناوی ئایین: هەندێك لەو كەسانەی هەڵدەستن بە كاری توندوتیژی لەژێر ناوی "جیهادی بۆلوان" كێشەی دەروونی و كۆمەڵایەتییان هەیە، خوازیاری رزگاربوونن لەو گرفتانە بە پاساوێكی شەرعی، چونكە دەزانن ئیسلام خۆكوژی حەرام كردووە، بۆیە ئەو كەسانە هەڵدەستن بە كاری تیرۆریستی لەژێر ناوی جیهاد لەپێناوی خوادا، بە ئامانجی سەرخستنی ئەو رێكخراوەی كە بڕوایان وایە نوێنەرایەتی ئیسلام دەكات و لەوپێناوەدا لە خەباتدایە، بەم كردەوەش لە خۆكوژەوە دەبنە شەهید، بەمەش بەو كردوەیە – بە بڕوای خۆیان – رزگاریان دەبێت لە كێشە و دەچنە بەهەشت، بەڵام ئەگەر خۆیان بكوژن ئەوە چارەنوسییان دۆزەخە.
4-ئەنجامدانی جەنگی دەروونی: ئەو كردەوانەی لە ژێر ناو "جبهادی بۆلوان" لە لایەن كەسێكەوە بە سادەترین كەرەستە ئەنجامدەدرێن، هەندێكجار كارەساتی گەورە و قوربانی زۆری لێدەكەوێتەوە، هەروەك ئەوەی بە هۆی بارهەڵگرێكەوە لە شاری نیس لە فەڕەنسا كە قوربانییەكی زۆری لێكەوتەوە، چەندبارەبوونەوەی ئەو كردەوانە بە دیوێكدا شكستی دەزگا ئەمنییەكان دەردەخات، بە جۆرێك هاووڵاتیانی ئەو وڵاتانە هەست بە ئاسایشی دەروونی ناكەن و هەمیشە لە دڵەراوكێدا چاوەڕێی هێرشی تیرۆریستین.
5-قورسی رێگری لەو كردەوانە: توانای ئاسایشی ئەو وڵاتانە هەرچەندە بەهێزبێت، بەڵام زەحمەتە بتوانن رێگری بكەن لە "جبهادی بۆلوان" یان پوچەڵكردنەوەی بەر لە ئەنجامدانی، چونكە زۆرینەی جار ئەوانەی ئەم كارانە دەكەن پێشتر لەلایەن دەزگا ئەمنیەكانەوە نەناسراون، یان تۆمەتی هیچ كارێكی تیرۆریستیان نەدراوەتە پاڵ، ئەو كەسەش كە ئەنجامی دەدات دڵنیایە لە مەرگی خۆی، بۆیە رێگری لەم جۆرە كارانە هەروا ئاسان نییە.
لە كۆتایدا دەتوانین بڵیین رێكخراوە تیرۆریستییە سنووربڕەكان خواستی خۆیان لە "جبهادی بۆلوان"دا دۆزیوەتەوە، چونكە ئەو جۆرە كارانە هیچ ئەركێكی ماددی ئەوتۆ ناخاتە ئەستۆی ئەو رێكخراوانە، تەنها پێویستی با بانگهێشتی هەوادارانی هەیە بۆ بەجێهێنانی ئەو جۆرە كارانە لە سەرانسەری جیهان، ئەمەش تەنها پێویستی بە بوونی نیەتی كوشتار و پاساوی شەرعی هەیە، ئەوەی مەترسیدارە ئەم كارە تیرۆریستیانە زۆرتر ئەو كەسانە ئەنجامی دەدەن كە پێشتر لە لایەن دەزگا ئەمنییەكانەوە نەناسراون، زۆرتریش كەسانی سڤیل بەئامانجگیراون و بوونەتە قوربانی، ئەمەش ئاماژەیە بۆ سەختی قۆناغی داهاتوو، كە ئەگەری هەیە كاری تیرۆریستی لەژێر ناوی "جبهادی بۆلوان" گەشەی زیاتر بەخۆیەوە ببینێـت ئەمەش پێویستی بە شێوازی ناباو هەیە بۆ رێگریكردن لێی و رووبەڕووبوونەوەی.

 

بۆ داگرتن کلیک لێرە بکە


سەرچاوە و پەراوێز:
1- Michael W. S. Ryan, How DAESH’s Lone Wolf Guidance Increases the Group’s Threat to the United States, Terrorism Monitor, November 24, 2015, accessible at: https://goo.gl/Ca0V66.
2- Gilbert A. Ramsay & Sarah V. Marsden, Leaderless global Jihadism: The paradox of discriminate violence, Journal of strategic studies, Vol. 38, no. 5, 2015, p. 584
3- Ibid., p. 582.
4- Michael W. S. Ryan, op.cit.
5ـ فرنسا, المعلومات المتفورة عن اعتداء نيس، موقع فرنسا24، 15 يوليو 2016، (http://www.france24.com).
6ـ المانيا، داعشي افغاني يهاجم ركاب قطار بفأس، موقع العربية، 19 يوليو 2016، (www.alarabiya.net).
7ـ مقال قس في هجوم شنته مسلحان (ينتميان للتنظيم الدولة) على كنيسة في فرنسا، موقع بي بي سي عربية، 26 يوليو 2016, (http://www.bbc.com/arabic).
8ـ محمد عصام دربالة، الجهاد الحقيقة الغائبة، الرياض، مكتبة العبيكان, 2005، ل15.
9ـ محمد على الشريف وناجح ابراهيم، تسليط الاضواء ما وقع في الجهاد من أخطاء،  الرياض، مكتبة العبيكان، الطبعة الاولى، 2014، ل78.
10ـ ناجح ابراهيم عبدالله، هداية الخلائق بين الغايات والوسائل، الرياض، مكتبة العبيكان، الطبعة الاولى، 2004، ل55.
11ـ ناجح ابراهيم عبدالله، حتمية المواجهة وفقه النتائج، الرياض، مكتبة العبيكان، الطبعة الاولى، 2004، ل39.
عبود الرمز، منهاج جماعة الجهاد، بحث غير منشور.





# داعش # جیهاد

زۆرترین خوێندراوە


Islamic Studies copyright 2017 © . All right reserved Developed by Avesta Group and powered by Microsoft Azure