ئەو گروپە ئیسلامییانەی لە پاڵ توركیا لە عەفرین دژی کورد دەجەنگن

27/01/2018

:: ئیدریس سیوەیلی

نزیكەی هەفتەیەكە حكومەتی توركیا هێرشێكی بەرفراوانی بۆسەر عەفرین لە رۆژئاوای كوردستان دەسپێكردووە، لەو هەڵمەتەدا چەندین گروپی ئیسلامیی نەیاری حكومەتی سوریا بەشدارن و پاڵپشتی لە هێرشەكانی توركیا دەكەن بۆ سەر عەفرین، لەم راپۆرتەدا ئەو گروپە ئیسلامییانە ناسێنراون كە لەو هێرشە بەشدارن، ئەوانیش:

1-بزووتنەوەی رزگاریخوازانی شامی ئیسلامیی

 یەكێكە لە گرووپە ئیسلامییە چەكدارەكانی نەیاری سوریا، لەسەر دەستی (حەسان عەبود) و یەكگرتنی چوار گرووپی ئیسلامیی (كەتیبەكانی رزگاریخوازی شام، بزووتنەوەی فەجری ئیسلامیی، بزووتنەوەی تەلیعەی ئیسلامیی، كەتیبەكانی ئیمان) دامەزراوە، توركیا پشتیوانی و كۆمەكی ئەم گروپە دەكات،  لە ناوچەكانی حەلەب و ئیدلیب و چەند شارێكی تر چالاكییان هەیە، بەڵام دوای كوژرانی سەركردە سەرەكییەكانی و بەشەڕهاتنی لەگەڵ دەستەی رزگاریخوازی شام، بەشێكی زۆر لە توناكانی لەدەستدا و زۆربەیان چوونە ناو ئەو دەستەیە،، ئەوەی ماوەتەوە چەند كەیتبەیەكی سەربازییە و لە پاڵ هێزەكانی توركیا لە عەفرین دەجەنگن.

2-بزووتنەوەی نورەدین زەنكی

 گروپێكی چەكداری نەیاری حكومەتی سوریایە ساڵی 2011 لەلایەن (تۆفیق شەهابەدین) لە باكوری خۆرئاوای حەلەب دامەزراوە، لەگەڵ توركیا پەیوەندی بەهێزی هەیە، بووە هاوپەیمانی دەستەی رزگاریخوازی شام بەڵام ناكۆكیان كەوتە نێوان، بە شێوەیەك گەیشتە پێكدادانی چەكداری، هەر بۆیە لە دەستەی رزگاریخوازی شام دوركەوتەوە و لە ئێستادا بەشدارە لە هێرش بۆسەر عەفرین.

3-فەیلەقی شام

 بەرەیەكی ئیسلامییە لە ئەنجامی یەكگرتنی (19) گرووپی ئیسلامیی نەیاری حكومەتی سوریا پێكهات لە (10 مارس 2014) بە سەركردایەتی (مونزیر سەراس)، زۆرینەی ئەو گرووپانە نزیكبوون لە ئیخوان موسلیمنی سوریاوە و لەژێر ناوی فەیلقی شام كۆبوونەوە، لەناوچەكانی حەما، حمس، حەلەب و ئیدلیب چالاكییان هەیە، لە ئێستادا بەشدارن لە هێرشی سەر عەفرین و رۆژانە چالاكییەكانی خۆیان لە تویتەر بڵاودەكەنەوە.

4-فیرقەی حەمزە

 گروپێكی نەیاری سوریایە سەر بە سوپای ئازادی سوریان، لە (23 نیسانی 2016) لە یەكگرتنی (5) گرووپی سەر بە سوپای سوریای ئازاد پێكهات بە سەرۆكایەتی سەیف ئەبوبەكر، لە لایەن توركیاوە پشتواانی سەربازی و دارایی دەكرێـت، لە (حوزەیرانی 2016) لیوای سەمەرقەند كە لیوایەكی توركمانین لە سوریا دایانەپاڵ فیرقەی حەمزە، لە كاتی هێرشی توركیا بۆسەر جەرابلوس یەكەم هێزبوون چوونە ناو شارەكە و دەستیانبەسەردا گرت. لەئێستادا پشتیوانی توركیا دەكەن لە هێرش بۆسەر عەفرین.

5-فیرقەی سوڵتان موراد

 ئەم لیوایە ساڵی (2015) لە ئەنجامی یەكگرتنی چەند گروپێكی توركمانی پێكهات لەوانەش (لیوای سوڵتان محەمەد فاتیح، لیولی شەهید زەكی توركمانی، لیوای شەهیدانی توركمان، ... تاد)، ئەم هێزە لە سوریە بە رەچەڵەك توركمانەكان پێكهاتوە و لە لایەن توركیاوە زۆرترین پشتیوانی دەكرێن، زۆرترین چالاكییان لە ناوچەكانی ریفی حەلەبە، لە ئێستادا لە لایەن (مەحمود حاجی حەسەن) سەركردایەتی دەكرێت و لەپاڵ هێزەكانی توركیا لە عەفرین دەجەنگن.

6-لیوای هەڵۆكانی شاخ

 گروپێكی سەر بە سوپای سوریای ئازادە، ناوەكەی لە (شاخی زاویە)وە وەرگیراوە، لە ناوچەكانی چارێزگای ئیدلب چالاكییان هەیە، لە بنەڕەتدا بەشێكن لە (لیوای نەوەكانی پێغەمبەر) پاشان چوونە ناو بەرەی شۆڕشگێڕانی سورپا كە لەلایەن قەتەرەوە پشتیوانی دەكرا، پاڵپشتی هێرشەكانی توركیا دەكەن بۆ سەر عەفرین.

7-بەرەی شام

 پێكهاتەیەكی چەكداری سوریایە لە باكوری ئەو وڵاتە چالاكی دەنوێنێت، لە ئەنجامی یەكگرتنی چەند گروپێكی ئیسلامیی سەلەفی لە (20 شوباتی 2015) پێكهات لەوانە: (بەشێك لە كەتیبەكانی نورەدین زەنكی، سوپای موجاهیدین، بەرەی ئیسلامیی، هەڵۆكانی شام، ... تاد). لە ئێستادا پشتیوانی لە هێرشەكانی توركیا دەكات بۆسەر عەفرین.

8-لیوای موعتەسەم

 لە ئەنجامی یەكگرتنی چەند گروپێك لە ناوچەی (مارع) لە ریفی حەلەب لە (4 ئاب 2015) بە سەركردایەتی (محەمەد خەلیل) پێكهات، لە لایەن توركیاوە پشتیوانی دەكرێن و لە هەڵمەتی قەڵغانی فوڕات كە لەلایەن توركیاوە كرایە سەر باكوری سوریا بەشداریان كرد، لە ئێستادا بەشداری هێرشی سەر عەفرین دەكەن.

9-سوپای سەركەوتن

 چەند گروپێكی پەڕاگەندە بوون سەر بە سوپای سوریای ئازاد لە ناوچەكانی ریفی حەما، ریفی ئیدلب، لازقیە و حەلەب، لە ژێر ناوی (سوپای سەركەوتن) بە رابەرایەتی (محەمەد مەنسور) یەكیانگرت، بەشدارن لە هێرشی توركیا بۆسەر عەفرین.


# توندڕەوی # تیرۆریزم

زۆرترین خوێندراوە


Islamic Studies copyright 2017 © . All right reserved Developed by Avesta Group and powered by Microsoft Azure