ئیسلامییەكانی كوردستان لە بیرەوەری سەركردەیەكی داعشدا

06/04/2019

:: ئیدریس سیوەیلی

رۆژی (24 ئازار 2016) دەزگاكانی راگەیاندن هەواڵی كوژرانی كەسی دووەمی داعشیان راگەیاند، ئەوكەسە كە لە قۆناغە جیاوازەكانی ژیانی چەندین نازناوی هەبووە، (ئەبوعەلا، ئەبوئیمان، ئەبوحەسەن، سەید خەلیل، ئەبوزەینەب، حاجی تاهیر، عەبدوڵا رەشید بەغدادی، ئەبوحەسەن قەرداش، ئەبوعەلی ئەنباری، ئەبوسوهەیب عێراقی، ئەبوموسعەب شامی، ئەوعەلا دارئیسلامیی، ئەبوعوبەیدە) نازناوی ئەو بوو، جێگری ئەبوبەكر بەغدادیە، ناوی راستەقینەی (عەبدوڕەحمان محەمەد مستەفا)یە، 1959 لە گوندێكی ناحیەی رەبیعە لە موسڵ لەدایكبووە، كۆلێجی شەریعەی لە بەغداد تەواوكردووە، دواتر بۆ ماوەی حەوت ساڵ لە ریزی سوپای عێراق سەربازی دەكات و پاشان دەبێتە مامۆستای قوتابخانە، لە نەوەدەكانی سەدەی رابردوو لە تەلەعفەر و دەوروبەری وەكو وتاربێژ دەركەتووە. كوڕەكەی (ئەبو عەبدوڵا ئەنباری) بیرەوەرییەكانی ئەبوعەلای نووسیوەتەوە، لە 2018 داعش بە شێوەی ئەلیكترۆنی چاپیان كردووە، لە زۆربەی شوێنەكان ئەبو عەبدولا دەقی قسەكانی باوكی وەكو خۆی دەگێڕێتەوە و باسی رووداوەكان دەكات، لە هەندێك شوێنی بیرەوەرییەكان باس لە پەیوەندی ئەبو عەلا و ئیسلامییەكانی كوردستان و هەندێك لە كەسایەتییەكان دەكات، هەروەك باس لە قۆناغەكانی ژیان و وابەستەبوونی بە گرووپە جیهادییەكانەوە دەكات.


بە وتەی خۆی لە سەرەتای سەدەی نوێ زنجیرە كتێبێكی دەربارەی جیهادی ئەفغانستان و چیچان بەدەستگەیشتووە، لەوانە زنجیرەی (عاشقانی شەهیدی)، ئەمەش كەڵكەڵەی مومارەسەی جیهاد و رۆیشتن بۆ جیهادی لە مێشكدا گەڵاڵە كردووە، لەوسەروبەندەدا كەسێكی هاوڕێی بە ناوی عەلی (ئەبو عومەر) هەواڵی پێداوە كە پیاوێك دەناسێت و دەتوانێت بیانگەیەنێتە كوردستان بۆلای موجاهیدەكان (مێژووی ئەم رووداوانە دەگەرێتەوە بۆ ساڵی 2001- سیوەیلی). ئەبوعەلا دەڵێت "وادەی سێ رۆژ دواترمان دانا لە شاری موسڵ كە ئەو كەسە ببینین، لە كاتی دیاریكراو چوینە گەراجی باكوور لە شاری موسڵ و چاوەرێی هاوڕێكەمان بووین، ئەمە یەكەم دیدارم بوو لەگەڵی، زانیم كە لە جەماعەتی عەلی باپیرە، كە قسەمان لەگەڵ كرد داوای كرد سەردانی عەلی باپیر بكەین لە ناوچەكەی خۆیان لە باكوری عێراق، وا رێكەوتین كە دوای كەمتر لە مانگێك دوای جەژن سەردانیان بكەین".


ئەبوعەلا بەردەوام دەبێت لە گێڕانەوەی بەسەرهاتەكە و دەڵێت "لە كاتی دیاریكراودا رۆیشتین، كەسێك كە ناوی (عەبدولوەهاب) بوو، لە گەراجی یەكێك لە شارەكانی كوردستان چاوەرێمان بوو، بردینی بۆ ماڵی خۆیان، خانویەكی بچكۆلەی گڵ بوو، چاوەڕێی ئەو كەسەمان دەكرد كە دیدارمان هەبوو لەگەڵی، كەسەكە هات خۆی ناساند ناوی (دڵشاد كەلاری) بوو، نوێنەری عەلی باپیر ئەمیری كۆمەڵ بوو، دڵشاد كەلاری كەوتە باسی كۆمەڵ كە بۆچی دروستبوون و چیان دەوێت، پاشان كەوتە باسی ئەمیرەكەیان كە ساڵانە دووجار خۆی بە پێوەرەكانی قورئان دەپێوێت تا بزانێت لە كوێدا پابەندە بە شەرعەوە و لە كوێشدا لایداوە تا خۆی چاك بكاتەوە".


بە وتەی ئەبوعەلا، دڵشاد كەلاری لە درێژەی قسەكانیدا وتویەتی: ئەگەر بیبینن –مەبەستی عەلی باپیر بووە- بە دڵنیاییەوە خۆشتان دەوێت، لەم قسانەدا بووە وێنەیەكی عەلی باپیری لە گیرفانی دەرهێناوە. وێنەكە سەرنجی ئەبوعەلای بۆلای خۆی راكێشاوە و لەوبارەوە دەڵێت "سەرنجمدا لە وێنەكە، عەلی باپیر تەسبیحێكی بەدەستەوە بوو، دواتر هاتینەدەر لە ماڵەكە و جێمان هێشت. لە رێگەی گەڕانەوەمان كەمێك قسەمان كرد لەگەڵ هاوڕێكەم، ئەوەی لە دڵی مندا دروستبوو هەمان شتیش لە دڵی ئەودا دروستبوو كە چۆن ئەمیری كۆمەڵێكی جیهادی وێنە دەگرێت یان تەسبیحی بەدەستەوەیە؟ هەر ئەمەش بووە هۆی دوركەوتنەوەمان لە كۆمەڵی ئیسلامیی".  


جێگرەكەی ئەبوبەكر بەغدادی، هەڵسەنگاندنی بۆ دۆخی دواتری عەلی باپیر ئەوەیە كە لە دین هەڵگەڕاوەتەوە و لەوبارەوە دەڵێت "عەلی باپیر  ئێستا (كاتی نووسینی بیرەوەرییەكان 2016- سیوەیلی) لە دین هەڵگەڕاوەتەوە و لە حكومەت بەشدارە. دوای دیدارەكەی دڵشاد كەلاری، پەیوەندیمان لەگەڵ عەبدولوەهاب هەر بەردەوام بوو، جارجار لە تەلەعفەر سەردانی دەكردم و پەیوەندیمان بەهێز بوو".


ئەبوعەلا دێتە سەر باسی پەیوەندی بە پشتیوانانی ئیسلام و ئاشنابوونی بەو رێكخراوە و دەڵێت "رووداوەكان خێرا تێدەپەڕین، رۆژێك عەبدولوەهاب لە ماڵی خۆمان سەردانی كردم كەسێكی تری لەگەڵ بوو وەكو نوێنەر و سەركردەی پشتیوانانی ئیسلام خۆی ناساند (ناوی ئەو كەسە ناهێنێت و ئاماژەی بەوەداوە كە ئەو كەسە لای حكومەتی عێراق بەندكراوە بۆیە ناوی ناهێنێت -سیوەیلی)، گفتوگۆی زۆرمان كرد دەربارەی بنەماكانی كاری پشتیوانانی ئیسلام، پەیوەندیمان بەیەكەوە بەهێز بوو داوای لێكردم سەردانی بكەم لە ماڵی خۆی لە بەغداد، ئەو سەركردەی پشتیوانانی ئیسلام لە بەغداد دادەنیشت".


هەرچەندە ئەبوعەلا زانیاریەكی ئەوتۆ دەربارەی ئەو كەسە ناداتە خوێنەر كە وەكو نوێنەری پشتیوانانی ئیسلام دەیناسێنێت، بەڵام جێگەی سەرنجە كە ئەو كەسە لەوكاتەدا ماڵی لە بەغداد بووە، رەنگە بە رەگەز عەرەب بێت یان كورد بێت و لەوێ نیشتەجێبووبێت و كاری بۆ ئەو هێزە كردبێت، لەوانەیە جۆرێك لە جۆرەكان رێكخەری پەیوەندی پشتیوانانی ئیسلام و رێكخستنەكانیان بوبێت لە ناوەڕاستی عێراق یان دەرەوە و رێكخراوی قاعیدە، بە تایبەت كە لە كاتی سەردانی ئەبوعەلا بۆ ماڵیان ئەبو موسعەب زەرقاوی لەوێ بووە، هەروەكو باسی دەكات و دەڵێت "رۆژگار تێپەڕی و سەردانی بەغدادم كرد، چوومە ماڵی نوێنەرەكەی پشتیوانانی ئیسلام، پێی وتم كەسێك میوانمە بە رەگەز ئوردنییە و لە ئەفغانستان بووە پاشان هاتوەتە كوردستان و ئێستا لێرەیە –بەغداد-، دوای نوێژی مەغریب میوانەكە هاتە لامان و پێكەوە نانمان خوارد و خۆی پێناساندم ئەویش ئەبو موسعەب زەرقاوی بوو".


نوێنەری پشتیوانانی ئیسلام جارێكی تر لە تەلەعفەر سەردانی ئەبوعەلا دەكات، داوا لە ناوبراو دەكات خۆی و ئەو كەسانەی متمانەی پێیەتی دەرچن بۆ جیهاد، بەڵام ئەبوعەلا مەرجی ئەوەی بۆ دادەنێت كە دەبێت خودی خۆی سەردانی بیارە بكات و لە نزیكەوە واقیعەكە ببینێ و ئەوكاتە بڕیار دەدات، مانگێك چاوەڕوان دەبن، دەرفەت ناڕەخسێت سەردانی بیارە بكەن، بۆیە ئەبوعەلا داوا لە نوێنەری پشتیوانانی ئیسلام دەكات فیلمێكی بەڵگەنامەیی دەربارەی خۆیان ئامادە بكەن و بۆیان بهێنن، هاوكات تۆمارێكی دەنگی یەكێك لە چەكدارانی پشتیوانانی ئیسلام كە لە بنەڕەتدا خەڵكی تەلەعفەر بوو گەیشتە دەستی ئەبوعەلا و باسی دۆخی پشتیوانانی ئیسلامی دەكرد.


زۆری نەخایاند نوێنەرەكەی پشتیوانانی ئیسلام جارێكی تر پەیوەندی دەكاتەوە بە ئەبوعەلا و داوای لێدەكات پێویستیان بە دكتۆرێكە هاوكاریان بێت، ئەمیش دەكەوێتەخۆ و پزیشكێكی ددان قەناعەت پێدەكات بچێتە بیارە، رێوشوێنەكانی ئامادەدەكەن بەڵام دواجار ناتوانن بیگەیەننە ناوچەكە و بیرۆكەكە وازلێدێنن.
هەر لە دانیشتنەكاندا نوێنەری پشتیوانانی ئیسلام داوا لە ئەبوعەلا دەكات هاوكاریان بێت لە دروستكردنی چەكی بێدەنگ (كاتم الصوت)، لە ماوەی دوو مانگدا ئەبوعەلا چەند دانەیەكیان بۆ دروستدەكات و دەیبات لە بەغداد رادەستی نوێنەرەكەی پشتیوانانی ئیسلامیی دەكات، ئیتر هیچ ئاماژەیەك بەوە نادات ئاخۆ ئەو چەكانە گەیشتونەتە دەستی پشتیوانانی ئیسلام لە ناوچەی هەورامان یان نا و ئەگەر گەیشتون چۆن گەیشتوون؟


دوای رووخانی بەعس و دروستبوونی ئەنسار سوننە بە سەركردایەتی ئەبوعەبدولا شافعی كە پێشتر رێبەری پشتیوانانی ئیسلام بوو، ئەبوعەلا بووە جێگری شافعی. كاتێك هەردوو گرووپی ئەنسار سونە و گرووپەكەی زەرقاوی كەوتنە وتوێژ تا كارەكایان تێكەڵی یەك بكەن، زەرقاوی و شافعی هەریەكەیان دەیانویست خۆی بەرپرسی كارەكە بێت، لەم نێوەندەدا ئەبوعەلا دەستبەرداری شافعی دەبێت و بەیعەت دەداتە زەرقاوی و دەبێتە جێگری.


ناكۆكی زەرقاوی و شافعی كۆتایی نەهات، هەردولا نیگەرانی خۆیان گەیاندە ئوسامە بن لادن و سەركردەكانی تری قاعیدە لە ئەفغانستان، دواجار بۆ یەكلاكردنەوەی ناكۆكییەكان، ئەبوعەلا بە نهێنی سەردانی وەزیرستان دەكات و چاوی بە ژمارەیەك سەركردەی قاعیدە دەكەوێت، پاش گەڕانەوەی (ئەنجومەنی شورای موجاهیدان)یان دامەزراند. دواتریش لەگەڵ راگەیاندنی داعش بووە جێگری ئەبوبەكر بەغدادی.

س: ڕۆژنامەی ئاژانس




# داعش # باشوری کوردستان

زۆرترین خوێندراوە


Islamic Studies copyright 2017 © . All right reserved Developed by Avesta Group and powered by Microsoft Azure