عەرەبەكان ناوبژیوانیی سەلەفییەكانی كوردستان دەكەن

28/07/2019

:: ئیدریس سیوەیلی

ئیدریس سیوەیلی

لەسەر دەستی ژمارەیەك كەسایەتیی سەلەفیی عێراقی، دوو گرووپی سەلەفیی كوردستان ڕێك دەكەون و كۆتایی بە ناكۆكیی نێوانیان دێنن.

لە هەفتەی ڕابردوودا دوو گرووپی سەلەفیی مەدخەلی لەسەر دەستی ژمارەیەك كەسایەتیی سەلەفیی عێراقی خەڵكی ڕیزوانیە كە بریتین لە: سەعد نایف، حەسەن مەرداوی، عەلی شەمەری، یوسف مەحمود و سەعد مەشهەدانی ڕێکكەوتنێكیان ئیمزا كردووە. بە پێی زانیارییەكان هەندێك لەو كەسایەتییە عەرەبانە بە هۆی دۆخی ئاڵۆزی عێراقەوە پێشتر ماوەیەك لە چەمچەماڵ نیشتەجێ بوون و ئاشنایەتییان لەگەڵ سەلەفییە مەدخەلییەكانی كوردستان هەیە، بەڵام لە ئێستادا گەڕاونەتەوە ناوچەكانی خۆیان، ئەوان خۆیان لە سەلەفییەكانی كوردستان بە زاناتر و نزیكتر لە شێخ ڕەبیع بن هادی مەدخەلی ڕێبەری سەلەفییەی مەدخەلی و كەسایەتییە سەلەفییەكانی تری سعودیە دەزانن، بۆیە بە جۆرێك لە جۆرەكان دەتوانن فشار بخەنە سەر سەلەفییەكانی كوردستان تا ناكۆكییەكانیان وەلا بنێنن و پێكەوە كار بكەن.

ڕێكکەوتنەكە لە (3 تەمموز 2019/ 30 شەوال 1440 كۆچی) لە شارۆچكەی چەمچەماڵ ئیمزا كراوە، گرووپی یەكەم پێك هاتوون لە: عەبدولكەریم محەمەد قادر، جومعە عەلی خورشید، عەبدولسەلام ڕەئوف، موحسین سلێمان زەڕایەنی، گرووپی دووەمیش پێك هاتوون لە: سیروان ئەشقەر، هۆشیار ئەحمەد، عەبدولكەریم جەلال قەیتولی، جوبرەئیل بابان، دانا عەبدوڵڵا ئەحمەد.

دوای ڕێکكەوتنەكە سەلەفییەكان دەقی ڕێكکەوتنەكەیان لە هەندێك ئەژماری خۆیان بڵاو كردەوە، بەڵام هەر زوو سڕیانەوە، ناوەڕۆكی ڕێكکەوتنەكە پێنج خاڵی لەخۆ گرتووە كە ئەمانەن:

١-هەوڵ و تێكۆشان بۆ وەرگرتنی زانستی شەرعی و بانگەوازكردن بۆ لای خوا، وەڵامدانەوەی ئەهلی باتڵ بە پێی بنەما شەرعییەكان (الضوابط الشرعیة) و ڕەچاوكردنی مەسڵەحەت و مەفسەدە.

٢-هەردوولا وەڵامدانەوەكانیان لەسەر یەكتری كە پەیوەندیی بە ناكۆكیی نێوانیانەوە هەیە بكێشنەوە.
٣-دەستهەڵگرتن و وازهێنان لە وەسفكردنی یەكتر بە تووند (شدة) و مومەییع.

٤-لەسەر هەڵەكار پێویستە پاشەكشە بكات لە هەڵەكەی.
٥-بە هیچ شێوەیەك پێش زانایان نەكەون لە قسەكردن لەسەر فیتنە و پێشهاتەكان، هانی هەموو لایەك بدەن لەسەر ئامۆژگاری، هاوكاری و سەرخستنی یەكتر.

بە سەرنجدان لە ناوەڕۆكی ڕێکكەوتنەكە، خاڵی یەكەمی تەرخان كراوە بۆ «وەڵامدانەوەی ئەهلی باتڵ»، مەبەستیشان لەمە گرووپ و خودی  د. عەبدوللەتیف ئەحمەد-ە، كە دوای چەند ساڵ لە پەیوەستبوون بە مەدخەلییەوە، وازی لەو گرووپە هێنا و پەیوەستبوونی خۆی بە جۆرێكی تری سەلەفی ڕاگەیاند كە بە سەلەفیی حەلەبی ناو دەبرێت، د. عەبدوللەتیف لە ئێستادا زۆرتر بە ڕووی حزبە ئیسلامییەكانی كوردستاندا كراوەتەوە، بۆیە هەندێك بە ئیخوانی سەلەفی ناوی دەبەن، بەڵام سەلەفییە مەدخەلییەكان بە مومەییع و حەلەبی و لادەر لە ڕێبازی سەلەفی ناوی دەبەن، بە تایبەت ئەو پەیوەندییەی ئەو هەیەتی لەگەڵ ئیسلامییەكان بە لای سەلەفیی مەدخەلییەوە سنووربەزاندنە و لادانە لە مەنهەجی سەلەفی. بڕگەی پێنجەمی ڕێكکەوتنەكەش پەیوەستە بە قسەكردن لەسەر ئەو پێشهاتە نوێیانەی ڕووبەڕووی سەلەفییەكان دەبێتەوە، لەمەشدا بەگوێرەی ڕێكکەوتنەكە، سەلەفییەكانی كوردستان مافی ئەوەیان نییە فەتوا بدەن و هەڵوێست دەربڕن، بەڵكوو لە دۆخێكی وادا دەبێت چاوەڕوانی فەتوا و هەڵوێستی ڕێبەرانی سەلەفی بن تا هەڵوێست و تێڕوانینان بخەنە ڕوو، ئەمەش بە دیوێكدا سەلماندنی پابەندبوونی سەلەفییەكانی كوردستانە بە ڕێبەرانی سەلەفیی سعودیەوە، هەروەك جۆرێك لە بێمتمانەییشە بە سەلەفییەكانی كوردستان كە زانیارییان لە ئاستێكدا نییە فەتوا بدەن و هەڵوێست دەربڕن.

سەلەفییەكان لەناو خۆیاندا چەندین زاراوە بۆ یەكتر بە كار دێنن و یەكتر تۆمەتبار دەكەن بە لادان لە ڕێبازی سەلەفی، هەروەك لە دەقی ڕێكکەوتنەكە دەبینین زاراوەی «توند و مومەییع»، كە پێشتر ئەم دوو گرووپەی ڕێكکەوتنیان كردووە بۆ یەكتریان بە كار هێناوە، هەریەك لەو زاراوانەش كە بۆ یەكتر بە كاری دەهێنن جۆر و سنووری مامەڵەكردن لەگەڵ بەرامبەر دەستنیشان دەكات، ئەمەش بەشێكە لە دونیابینیی سەلەفییەكان بۆ مامەڵەكردن لەگەڵ ئەویتر.

# سەلەفی

زۆرترین خوێندراوە


Islamic Studies copyright 2017 © . All right reserved Developed by Avesta Group and powered by Microsoft Azure