دانوستانه‌کانی نێوان ئه‌رمینیا و ئازه‌ربایجان له‌سه‌ر هه‌رێمی ناگۆرنۆ کاراباخ: لێکدانه‌وه‌ بۆ گۆڕاوه‌ ناوخۆیی و ده‌ره‌کییه‌کان و و ئاسۆی ئاینده‌

21/12/2021

کۆسره‌ت خدر ئەبوبەکر

پێشه‌کی
 دانوستان به‌گشتی و دانوستانی نێوده‌وڵه‌تی به‌تایبه‌تی، دوو چه‌مک و تێگه‌ی سه‌ره‌کین که‌ له‌سه‌ر هه‌ردوو ئاستی تیۆری و پراکتیکی، گرنگی و بایه‌خیان له‌ژیانی ئه‌کادیمی و سیاسیدا ڕوو له ‌زیادبوونه‌، به‌تایبه‌تریش له‌ بواره‌کانی سیاسه‌تی ده‌ره‌وه‌ و په‌یوه‌ندییه‌ دیپلۆماسی و نێوده‌وڵه‌تییه‌کاندا. هۆکاری سه‌ره‌کی ئه‌و زیادبوونی گرنگییه‌ش ڕه‌نگه‌ به‌شێکی زۆری بۆ ئه‌وه‌ بگه‌ڕێته‌وه‌، که‌ به‌کارهێنانی دانوستان وه‌ک یه‌کێک له‌ عه‌قڵانیترین، که‌متێچووترین، باشترین و سه‌ره‌کیترین ئامڕازە‌ دیپلۆماسییه‌کان بۆ یه‌کلاکردنه‌وه‌ی ناکۆکییه‌ نێودوڵه‌تییه‌کان له‌ ڕابردوو زیاتر بووه‌. هه‌روه‌ها له‌گه‌ڵیشیدا گرنگیپێدانی خوێندنی ئه‌کادیمی و نووسین و توێژینه‌وه‌ له‌و بواره‌ له‌ ڕابردوو فراوانتر و قوڵتر بووه‌ته‌وه‌.
له‌ سه‌رده‌می ئێستادا، ده‌وڵه‌ت و یه‌که‌ نێوده‌وڵه‌تییه‌کانی تر، زۆرجار له‌بری جه‌نگ و ئامڕاز‌ه‌ سه‌ربازییه‌کان، په‌نا ده‌به‌نه‌ به‌ر ڕێگای دیپلۆماسی و دانوستان بۆ یه‌کلاکردنه‌وه‌ی ناکۆکییه‌کانی نێوانیان. یاخود زۆرجار له‌ ده‌ره‌نجامی هه‌ستکردن به‌ قورسیی و زۆرتێچوونی جه‌نگ و لێکه‌وته‌ خراپه‌کانی، جارێکی تر ئه‌و ئه‌کته‌رانه‌ ده‌گه‌ڕێنه‌وه‌ سه‌ر دانوستان بۆ وه‌ستاندنی شه‌ڕه‌کانیان و یه‌کلاکردنه‌وه‌ی ناکۆکییه‌کانیان، یاخود وه‌ستاندنی پێکدادانه‌ سه‌ربازییه‌کانی نێوانیان.
 ده‌کرێت بوترێت که‌ دانوستانه‌کانی نێوان ئه‌رمینیا و ئه‌زه‌ربایجان له‌ساڵی 2020دا، سه‌باره‌ت به‌ هه‌رێمی ناگۆرنۆ_کاراباخ و وه‌ستاندنی شه‌ڕ و ناکۆکییه‌کانی نێوانیان به‌ هه‌وڵ و نێوه‌ندگیری ڕووسیا و چه‌ند لایه‌نێکی تر، یه‌کێکه‌ له‌و نموونانه‌ی که‌ گرنگی و بایه‌خی دانوستانه‌کان بۆ چاره‌سه‌رکردنی ناکۆکییه‌کان و وه‌ستاندنی پێکدادانه‌ سه‌ربازییه‌کان باشتر ده‌رده‌خات. له‌م توێژینه‌وه‌یه‌دا هه‌وڵده‌ده‌ین به‌ ورده‌کاری و لێکدانه‌وه‌ی زانستی ده‌رباره‌ی ئه‌و دانوستانانه‌ و ده‌ستکه‌وته‌کانی و هۆکاره‌ کاریگه‌ره‌کان و کاردانه‌وه‌ نێوده‌وڵه‌تییه‌کان ده‌رباره‌ی بوه‌ستین.

بۆ داگرتن کلیکی ئێرە بکە

زۆرترین خوێندراوە


terrorism & Security studies copyright 2017 © . All right reserved Developed by Avesta Group and powered by Microsoft Azure